Биылғы қаңтар-сәуір аралығында Австрияға экспорт көлемі 1310,3 млн.АҚШ долларына жетті
АСТАНА. 10 маусым. ҚазАқпарат - Бүгін қазақстандық-австриялық іскерлік кеңес аясында Қазақстан Республикасы Экономика және бюджеттік жоспарлау министрлігі Халықаралық ынтымақтастық департаментінің директоры Қайрат Төребаев Австрия іскерлік делегация өкілдерімен кездесу өткізді.
Өз баяндамасы барысында Қайрат Төребаев Қазақстан Республикасы мен Австрия Республикасы арасындағы екі жақты сауда-экономикалық қатынастар оң динамикасымен ерекшеленетіндігін және болашағының зор екендігін атап өтті. Ағымдағы жылдың қаңтар-сәуір айларында Қазақстан мен Австрия арасындағы сауда айналымының көлемі 1407,2 млн.АҚШ долларын құрады.
«Қазақстанның Австрияға экспорт көлемі 2013 жылғы қаңтар-сәуір айларында 1310,3 млн.АҚШ долларына жетті. Австриядан Қазақстанға импорт көлемі 2013 жылғы қаңтар-сәуір айларында 96,9 млн.АҚШ долларын құрады»,-деп хабарлады ҚР ЭБЖМ баспасөз қызметінен.
Іс-шара екі ел арасындағы сауда-экономикалық ынтымақтастықты кеңейту мақсатында ұйымдастырылды.
Кездесу соңында қазақстандық тарап австриялық тарапқа Астанадағы ЕҚЫҰ Саммитін өткізу секілді Қазақстанның халықаралық бастамаларына белсенді қатысқандықтары үшін, сондай-ақ, «ЕХРО - 2017» халықаралық көрмесін өткізу мақсатында Астана қаласының кандидатурасына қолдау көрсеткендері үшін ризашылық білдірді.
