Біздің еліміз жаһандық ядролық сұхбаттың белсенді мүшесіне айналды - ҚР Президенті
АСТАНА. Тамыздың 27-сі. ҚазАқпарат - Қазақстан жаһандық ядролық сұхбаттың белсенді мүшесіне айналды. Бұл туралы Астанада, жұма күні өткен Қазақстан Республикасы Конституциясының 15 жылдығына арналған «Конституция - мемлекеттің демократиялық дамуының негізі» атты халықаралық ғылыми-тәжірибелік конференцияның ашылуында Елбасы Нұрсұлтан Назарбаев мәлім етті.
Н.Назарбаев атап өткендей, біздің еліміз әлем мемлекеттері арасынан алғашқы болып атомдық қарудан бас тартты, әлемдегі ірі Семей полигонын тоқтатып, жаһандық ядролық сұхбаттың белсенді мүшесіне айналды.
«Бүгінде Қазақстан БҰҰ-ға ядросыз әлем туралы арнайы Декларацияны қабылдауды ұсынып отыр. Негізгі заңымыз Қазақстан сыртқы саясатының үйлесімділік, өлшемділік, көпбағыттылық сияқты басты мақсаттарын бекітті», - деді Мемлекет басшысы.
