БҚО-да тағы бір адам суға кетті
ОРАЛ. ҚазАқпарат - Теректі ауданы Подстепный ауданы тұсында кеше кешкі сағат 20.00 шамасында 1985 жылғы ер адам Барбастау өзеніне суға кетті.
БҚО ТЖ департаментінен түскен мәліметке қарағанда, қазіргі кезде оның денесі іздестірілуде.
Еске сала кетейік, облыста 6-8 тамыз аралығында төрт бала «тілсіз жаудың» құрбаны болды. Оған қоса 6 тамыз күні Ақжайық ауданы Тайпақ ауылында 25 жасар жігіт суға кетіп, денесі таптырмай жатыр.
Биыл өңірде 19 адам суға кетсе, соның сегізі - балалар. Бұл «тізімге» әзірге денесі судан шықпаған соңғы екі адам енгізіле қойған жоқ.
Мұндай қайғылы оқиғаға ұшыраудың негізгі себебі суға шомылуға болмайтын жерден түсу болып отыр. Сондай-ақ балалардың ата-аналарының қарауынсыз жүруі, адамдардың мас күйінде түсуі, судағы қауіпсіздікті сақтамау себеп болуда.
