Бозбала Нұрсұлтан Назарбаев көпшілікті таусылмас ерік-жігерімен және мақсаткерлігімен таң қалдырды - З.Шуатаева

КӨКШЕТАУ. ҚазАқпарат - Бозбала Нұрсұлтан Назарбаев көпшілікті таусылмас ерік-жігері, мақсаткерлігі және өз ойын өзгеге түпкілікті жеткізе алатындығымен таң қалдыратын. Бұл туралы Көкшетау қаласының құрметті азаматы, «Нұр Отан» партиясы АОФ Саяси кеңесінің, Ақмола облысының Қазақстан халқы Ассамблеясының, Қазақстан Республикасының әйелдер одағының мүшесі, қоғам қайраткері, еңбек ардагері Зура Шуатаеваның «Ұрпақтар сабақтастығы» жобасы аясында жастармен кездесуінде айтылды.

«Үлкенге кұрмет, кішіге ізет» тақырыбында өткен кездесу барысында Зура Шуатаева Елбасымен өзінің таныстығы жөнінде жастарға әңгімелеп берді. Сондай-ақ Тұңғыш Президент туралы қызықты әңгімелерімен қатар, жоғары партиялық мектепте бірге білім алған сәттерінде еске алды.

«Мен Мемлекет басшысы Нұрсұлтан Назарбаевпен 50 жылдан астам таныспын. Алғаш рет Елбасыны ҚКЖЛК ОК-нің XI съезінде көрген болатынмын. Сол кезде 19 жастағы бозбала Нұрсұлтан көпшілікті таусылмас ерік-жігері, мақсаткерлігі және өз ойын өзгеге түпкілікті жеткізе алатындығымен таң қалдырды. Біздің Елбасы - барлығымызға үлгі болар тұлға. Болашақта барлық жастардың осындай жетістіктерге жетуін тілектеспін», - деді Зура Шуатаева.

Кездесу барысында жастар Зура Шуатаеваға өздерінің көкейлерінде толғандырған сұрақтарын қойып, тұшымды жауаптар алды.