BP Azerbaijan Каспий теңізінде жаңа платформа салуды жоспарлап отыр

АСТАНА. KAZINFORM – Бұл «Шахдениз» кен орнының жекелеген қабаттарынан төмен қысымды газды жинап, оны Сангачал терминалына жеткізуге арналған мүлде жаңа компрессорлық платформа болмақ, деп хабарлайды Kazinform меншікті тілшісі.

Компанияның мәліметінше, жаңа платформаның құрылыс жобасы келесі аптада көпшілік назарына ұсынылып, ақпан айының үшінші аптасында платформаның қоршаған ортаға әсерін бағалау есебі бойынша қоғамдық тыңдаулар өтеді.

- Қаржыландыру туралы соңғы шешім (FID) осы жылы қабылданады, - деп хабарлады компанияның баспасөз қызметінен.

Сондай-ақ, платформа адамның тұрақты қатысуынсыз жұмыс істейтіні атап өтілді.

- Alpha және Bravo платформаларынан төмен қысымды газ осында жиналып, қысымды арттырғаннан кейін Сангачал терминалына жіберіледі, - делінген хабарламада.

Бұл ретте платформаның құрылысы миллиардтаған инвестицияны қажет етеді.

Осыған дейін Тоқаев пен Эмбало Бисау порты мен Транскаспий дәлізін ұштастыру жолдарын зерделеуге келіскені туралы жаздық.