Бірінші лига: «Каспий» өз алаңында «Оқжетпестен» жеңілді

АСТАНА. KAZINFORM – Футболдан Бірінші лига командалары арасындағы Қазақстан біріншілігінің XVІ турының алғашқы ойын күні өтті. 

Ақтаулық «Каспий» футбол клубы өз алаңында Көкшетаудың «Оқжетпесін» қабылдады. Екі команда биыл Премьер-лигаға оралуға ниеттеніп отыр. Алайда маңғыстаулық ұжым кейінгі ойындарын сүреңсіз өткізуде. Ал, «Оқжетпес» кейінгі бес ойынның барлығында жеңіске жетіп, турнир кестесінде бірінші орынға көтерілді.  

Бүгінгі қос команда арасындағы ойын тартысқа толы болды. Кездесу тағдырын 80-минутта «Оқжетпес» сапынан Алияр Мұхамед соққан жалғыз гол шешті. Ол жақында ғана команда құрамына Талдықорғанның «Жетісу» командасынан ауысып келген еді.

Осылайша «Оқжетпес» қарсыласын 1:0 есебімен тізе бүктіріп, турнир кестесінде көш басына шықты.

Сондай-ақ 17 шілдеде Оралдың «Ақжайығы» өз алаңында елордалық «SD Family» командасын 2:1 есебімен жеңсе, «Тараз» алматылық «Хан Тәңіріне» 0:1 есебімен жол берді.

Енді 18 шілдеде «Арыс» (Түркістан облысы) мен «Алтай» (Өскемен), «Жетісай» (Түркістан облысы) мен «Ақтөбе-2», «Қайрат-2» (Алматы) мен «Ұлытау» (Жезқазған), «Қайсар-2» (Қызылорда) мен «Tүркістан» ойнайды.

Еске салсақ, бұдан бұрын Премьер-лигада «Қайрат» пен «Жеңіс» тең түсті.