Брюссельде Қазақстан мен Еуроодақ арасындағы Сот төрелігі және құқықтық тәртіп шағын комитетінің 10-шы отырысы өтеді
АСТАНА. 28 қараша. ҚазАқпарат /Марлан Жиембай/ - Ертең Брюссельде Қазақстан мен Еуроодақ арасындағы Сот төрелігі және құқықтық тәртіп шағын комитетінің 10-шы отырысы өтеді. Бұл туралы бүгін апталық брифингте ҚР СІМ ресми өкілі Алтай Әбибуллаев мәлім етті.
Ресми өкілдің атап өтуінше, Қазақстанның делегациясын Бас прокурордың бірінші орынбасары Иоганн Меркель, ал еуропалық делегацияны Еуропалық сыртқы саясат қызметінің Орталық Азия бойынша басқармасының басшысы Виктор-Андрес Малдонадо басқарады.
«Қатысушылар бостандық, қауіпсіздік, сот төрелігі және құқықтық тәртіп мәселелері бойынша Еуроодақ пен Қазақстан арасындағы келісімдердің орындалу барысын талқылауды және алдағы ынтымақтастық басымдылықтарын анықтауды жоспарлап отыр», - деді ол.
Сонымен қатар А.Әбибуллаевтың сөзіне қарағанда, отырыс барысында соттың заң жүйесін қадағалау, сот жүйесін тиiмдi басқару мүдделерін жоғарылату, көші-қон, есірткімен және лаңкестікпен күрестің жаңа жолдарын айқындау мәселелері бойынша өзара пікір алмасу көзделген.
