Бухгалтерлер одағы «Халық бухгалтері» бастамасына өз мамандарын тегін ұсынбақшы

АСТАНА. KAZINFORM — Бухгалтерлер одағының төрағасы Мереке Жұматов Үкімет отырысында «Халық бухгалтері» бастамасына тегін үлес қосатындарын мәлім етті.

— Біз Қаржы министрлігінің бастамасын қолдаймыз және өз ресурстарымыз бен аудиторияларымызды, онлайн алаңдарымызды, тәлімгерлерімізді ақысыз негізде ұсынамыз. Біздің аккредиттелген оқу орталықтарымыздың Мемлекеттік кірістер комитетімен бірлесе отырып бизнесті кезең-кезеңмен дайындауға арналған жол картасын әзірлеп жатыр, — деді ол Үкімет отырысында.

Оның айтуына қарағанда, одақ өкілдері Астана мен аймақтарда жаңа салық талаптары туралы семинарлар мен онлайн курстар ұйымдастырмақшы.

— Кәсіпкерлерге арналған әдістемелік ұсынымдарды, тексеру парақтарын дайындаймыз. Әрбір кәсіпкер жеке көмек алатын онлайн кеңес беру алаңдарын іске қосамыз, — деді Мереке Жұматов.

Айта кетейік, бүгінгі Үкімет отырысында микро және шағын бизнесті қолдау шараларын талқыланды.