Бүкіләлемдік рухани келісім конгресінің қатысушылары студенттермен кездесті
АСТАНА. 19 қазан. ҚазАқпарат - Бүгін Бүкіләлемдік рухани келісім конгресінің қатысушылары Еуразия ұлттық университетінің студенттерімен кездесті.
Кездесу барысында конгрестің ұйымдастырушысы, депутат Төлеген Мұхамеджанов атап көрсеткендей, Бүкіләлемдік рухани келісім конгресін қазанның 18-і күні өткізу бастамасы жайдан-жай көтерілген жоқ. Оның айтуынша, тура 100 жыл бұрын осы іспетті форум АҚШ-тың Чикаго қаласында ұйымдастырылған болатын. «Ал араға бір ғасыр салып, Қазақстан Бүкіләлемдік рухани келісім конгресін өз жерінде өткізуге бел буып, соңғы 20 жыл бойы ол іс-шараны абыроймен атқарып келеді, Меніңше, «Рухани мәдениет - әлемді жаңартудың кілті» тақырыбындағы конгресс 2013 жылы Қазақстанда ұйымдастырылатын II Бүкіләлемдік рухани мәдениет форумына жан-жақты дайындалуға мүмкіндік бермек», - деп атап көрсетті Т.Мұхамеджанов.
Айта кетейік, кездесуге Қазақстанның ЮНЕСКО-дағы тұрақты өкілі Олжас Сүлейменов, Әзірбайжанның белгілі ақыны, композитор Болат Бұлбұлоглы және тағы басқа белгілі тұлғалар қатысып, студент-жастарға салиқалы әңгіме айтты.
