Бундестаг делегациясы «Халықаралық парламенттік стипендия» бағдарламасына қатысатын үміткерлерді іріктейді
Бұл туралы Германия Федеративтік Республикасының Қазақстандағы Елшілігінің баспасөз қызметі хабарлап отыр.
«Желтоқсанның 7-сі мен 10-ы аралығында Қазақстанға Германия Бундестагының делегациясы келеді. Олар Халықаралық парламенттік стипендия» бағдарламасына қатысуға үміткерлермен әңгімелеседі. Делегацияны Бундестаг депутаты Йенс Акерманн бастап келеді», делінген Елшіліктің баспасөз баянында.
Аталмыш бағдарлама аясында 28 мемлекеттен 120 стипендиат 2010 жылы наурыздың 1-і мен шілденің 31-і аралығында Бундестаг көтеретін стипендия ала отырып, Германияның парламенттік жүйесімен танысады. Бағдарламаның мақсаты - стипендиаттарға Германиядағы саяси үдерістермен, шешімдердің демократиялық жолмен қабылдану барысымен танысуға, Бундестагтағы барлық үдерістерді өз көздерімен көруге мүмкіндік беру. Стипендиаттар депутат кеңсесінде жұмыс істейтін болады. Олар сондай-ақ, Берлин университетінде дәрістер және семинарлар тыңдайды.