Бұны Қазақстанның «Бокс күні» десе де болады – министр әлем чемпионатындағы жетістіктер жайлы
«Олар осы күннің батырлары. Кешеден бері біздің батырларымыз кәсіби бокста да жеңіске жетіп жатыр. Бейресми айтсақ, Қазақстанда «Бокс күні» болды. Осы жылдың күзінде Азия чемпионаты өтеді. Келер жыл – үлкен сынақ жылы. Парижде Олимпиада өтеді. Сол сайыстарға дайындалып, спортшыларды қолдауымыз керек», - деді Асхат Оралов.
Сондай-ақ министр боксшыларымыздың әлем чемпионатында көрсеткен нәтижесі тарихи жеңіс екенін атап өтті.
«Халқымыз бокстың «алтынына» үйреніп қалды. Алайда, біраз жыл «алтын» болмай қалды. Кешегі жетістікті – тарихи ұлы жеңіс деп айтуға болады. Болашақта бұл жетістікпен тоқтамаймыз», - деп мәлім етті ведомство басшысы.
Қоса кетсек бүгін жеңімпаздардың алғашқы легі елге оралды. Чемпиондардың екінші тобы – Санжар Тәшкенбай мен Нұрбек Оралбай Астана уақытымен сағат 16:00-де елордаға қонады.
Айта кетейік, Қазақстан құрамасы Өзбекстанда өткен әлем чемпионатын 4 алтын, 1 күміс медальмен аяқтады.
