Бурабайда «Жібек жолы бойындағы сұхбат» халықаралық мәдени жобасының VIII отырысы өтеді
АСТАНА. ҚазАқпарат - 27-28 тамыз аралығында Ақмола облысы «Бурабай» курорты аймағында орналасқан «Rixos Borovoe 5» отелінде «Жібек жолы бойындағы сұхбат» халықаралық мәдени жобасының VIII отырысы өтеді.
Отырыстың тақырыбы - «Ұлы жібек жолы бойындағы интеграциялық үдерістер: өткені, бүгіні, келешегі». Модератор - қоғам қайраткері, мәдениеттанушы - Мұрат Әуезов.
Атап айтқанда, 27 тамыз күні сағат 11.00-де БАҚ өкілдері үшін жоба қатысушыларының баспасөз конференциясы ұйымдастырылып, ал сағ.14.00-де Қазақстан халқы Ассамблеясы Төрағасының орынбасары - Хатшылық меңгерушісі Ералы Тоғжановтың қатысуымен алқалы жиын ашылады.
Жоба ұйымдастырушылары: Қазақстан халқы Ассамблеясы, ҚР Мәдениет және спорт министрлігі, Л.Н.Гумилев атындағы Еуразия ұлттық университетінің ЮНЕСКО кафедрасы, ҚХА Әлеуметтік концорциумы және Мұхтар Әуезов атындағы қоғамдық қорлары.
Іс-шараға ҚР Парламентінің депутаттары, елшіліктер мен дипломатиялық миссиялар өкілдері, халықаралық сарапшылар, ғалымдар, мәдениеттанушылар, ҚХА мүшелері, этномәдени және қоғамдық бірлестіктердің, мемлекеттік органдардың өкілдері, сондай-ақ Қазақстан, Өзбекстан, Тәжікстан, Қырғызстан және Түркіменстан елдерінің БАҚ-тары қатысады.
