Чемпиондар лигасы: «Қайрат» бірінші кезеңнен кейін «Пальмадан» жеңіліп жатыр

АСТАНА. KAZINFORM - Футзалдан Чемпиондар лигасы финалындағы қазақстандық «Қайрат» пен Испанияның «Пальма» кездесуінің бірінші кезеңі аяқталды.

Алғашқы минуттан қос команда бірден шабуылға көшті. Екеуінің де гол соғатын мүмкіндігі болды. Десе де оны өз пайдасына жарата алған жоқ.

Ойынның 6-минутында испаниялық клубтан Хесус Гордильо мергендік танытса, оған 8-минутта «Қайрат» сапынан Кайо Руис бір голмен жауап қайырды. Ал 18-минутта «Пальма» сапынан Лукас Машадо тағы бір гол соқса, 19-минутта Марио Равильос есепті үстемелей түсті.

Қазірге дейін қарсыластар екі мәрте кездесті. Чемпиондар лигасы топтық кезеңінде 2022 жылы алғашқы ойында 2:2 есебімен тең түссе, 2023 жылы испаниялық команда 4:3 есебімен жеңіске жетті.

Алматылық команда бұған дейін бұл турнирде 20 мәрте бақ сынап үлгерді. Бұл жөнінен Еуропа құрлығындағы клубтар арасында абсолютті рекордты тіркеді. Олар 2012/13, 2014/15 жылғы маусымда Чемпиондар лигасында жеңіс тұғырына көтерілген. Ал «Пальма» аталған турнирде 2022/23, 2023/24 жылдары жеңімпаз болды.

Айта кетсек, 3-орын үшін ойында Португалияның «Спортинг» клубын 3:2 есебімен жеңген Испанияның «Картахена» командасы қола медаль алды.