Дамаск маңында Израиль соққысынан жеті адам қаза тапты
АСТАНА.KAZINFORM — Сирия қорғаныс министрлігі жексенбі күні Сирия астанасының оңтүстігіндегі Сайеда Зайнаб ауданындағы тұрғын үйге жасалған соққыдан 7 бейбіт тұрғын қаза тапты деп хабарлады. Бұл бір аптадан аз уақыт ішінде жасалған екінші шабуыл, деп жазады Kazinform агенттігінің меншікті тілшісі.
Министрлік мәлімдемесінде қаза тапқандар арасында әйелдер мен балалар бар екені және 20 адамның жараланғаны айтылған.
Өткен аптада Израиль әуе күштері «Хезболланың» сол аймақтағы барлау нысандарына соққы бергенін мәлімдегенімен, бұл соққыға қатысты пікір білдірмеді.
«Хезболла бекінісі және шиіттердің негізгі құлшылық орны орналасқан Сайеда Зайнаб аймағы бұрын да Израиль соққыларының нысанасы болған. Құлшылық орны жанындағы қатты гарнизондық аймақ та „Хезболла“ ұйымының белгілі тірегі», — деп хабарлайды Reuters.
Кейін Сириядағы адам құқықтарын бақылау орталығы (SOHR) қаза тапқандар саны тоғызға жеткенін хабарлады. Олардың арасында төрт бейбіт тұрғын (әйел мен оның үш баласы), Хезболланың бір қолбасшысы және төрт белгісіз адам бар. Тағы 14 адам зардап шекті, олардың арасында балалар мен әйелдер де бар.
SOHR сенімді дереккөздерге сілтеме жасап хабарлауынша, Израиль шабуылы ливандық отбасылар мен Хезболла мүшелері тұратын ғимараттағы пәтердегі адамдарды нысанаға алған.
Израиль 2023 жылы 7 қазанда ХАМАС-тың Израильге жасаған шабуылынан кейін және әсіресе Израиль мен Хезболла арасындағы қақтығыстың шиеленісуінен кейін Сирияға шабуылдарын күшейтті.
Иран Сыртқы істер министрлігі Сирияға әуе шабуылынан кейін Израильге қару-жарақ эмбаргосын енгізуге және бұл елді Біріккен Ұлттар Ұйымынан шығаруға шақырады.
Сыртқы істер министрлігінің өкілі Исмаил Багаи Тегеран «сионистік режимнің бүгін Дамаск аймағындағы тұрғын үйге жасаған агрессивті шабуылын қатаң айыптады» деді.
Бұған дейін Биньямин Нетаньяху жексенбі күнгі апталық кабинет отырысында қыркүйектегі «Хезболла» мүшелерінің пейджерлері мен радиолары жарылысының артында Израиль тұрғанын алғаш рет мойындағанын хабарлаған едік.
