Денсаулық сақтау министрлігі елдегі педиатриялық қызметті күшейтіп жатыр
АСТАНА. KAZINFORM — Балаларды кешенді медициналық сүйемелдеуді қамтамасыз ету мақсатында соңғы бір жылда емханаларда 366 педиатриялық бөлімше және шамамен сонша Даму және ерте араласу орталығы ашылды, деп хабарлайды ДСМ баспасөз қызметі.
Педиатриялық бөлімшелерді құру:
• балалардың денсаулығын туған сәтінен бастап жүйелі бақылауды қамтамасыз етуге;
• даму бұзылыстарын ерте анықтауды күшейтуге;
• мультидисциплинарлық тәсілді енгізуге;
• мамандандырылған көмекті отбасылардың тұрғылықты жеріне жақындатуға мүмкіндік береді.
Педиатриялық бөлімшелердің құрамына:
• педиатр дәрігерлер кабинеттері;
• Даму және ерте араласу орталықтары (ДЕАО), оның ішінде:
• патронаж қызметінің дәрігер-супервизоры кабинеті;
• патронаж мейіргерлер кабинеттері;
• бала дамуы жөніндегі мамандар;
• тамақтану бойынша ресурстық орталық;
• дыбыс оқшаулауы бар аудиологиялық скрининг кабинеті;
• егу кабинеті;
• мектеп медицинасы кабинеті кіреді.
Егер баланың даму ерекшеліктері анықталса, ол Даму және ерте араласу орталығына жіберіледі. Мұнда баланы мультидисциплинарлық команда сүйемелдейді: педиатр, патронаж мейіргері, реабилитолог, логопед, психолог және басқа да мамандар.
— Бір жылдың ішінде орталықтарда 72 мыңнан астам балаға консультация берілді, ал даму бұзылыстарын анықтау көрсеткіші 21,5%-ға артты. Осылайша, жүйе медициналық көмектің деңгейлерін бөлу қағидатына негізделіп құрылған, мұнда жалпы практика дәрігері (ЖПД) алғашқы байланыс және үйлестіру функциясын атқарады, ал қажет болған жағдайда мамандандырылған педиатриялық көмек қосылады, — делінген хабарламада.
Мұндай тәсіл көптеген балалар үшін медициналық көмектің қолжетімділігін қамтамасыз етіп, сонымен бірге күрделі клиникалық жағдайларда мамандандырылған көмек алу мүмкіндігін сақтауға мүмкіндік береді.
Баланы қарап, оған ем-дом тағайындайтын педиатр дәрігердің қабылдауы әдетте қымбат болып келеді. Осы ретте Kazinform агенттігінің тілшісі қалалардағы қабылдау қызметінің бағасын салыстырды.
