Дмитрий Медведев «Біріккен зымыран-ғарыш корпорациясы» ААҚ басшысын тағайындады
АСТАНА. ҚазАқпарат - РФ Үкіметінің төрағасы Дмитрий Медведев № 370-р өкімге қол қойды, онда былай делінген: «Ресейғарыштың белгіленген тәртіппен Игорь Анатольевич Комаровты «Біріккен зымыран-ғарыш корпорациясы» ашық акционерлік қоғамының бас директоры қызметіне сайлау туралы ұсынысы қабылдансын».
Бұл туралы «Космонавтика жаңалықтары» сайты хабарлады.
Осы тағайындауға дейін Игорь Комаров Ресейғарыш басшысы Олег Остапенконың орынбасары, ал одан бұрын «АвтоВАЗ» бас директоры болды.
Сондай-ақ Ресей Үкіметі басшысының өкімімен «Біріккен зымыран-ғарыш корпорациясы» ААҚ-ны басқаруға мемлекеттің қатысуы бекітілді.
«Қабылданған шешім мемлекетке ««Біріккен зымыран-ғарыш корпорациясы» ААҚ-ны тиімді басқаруды ұйымдастыруға мүмкіндік береді, оған отандық зымыран-ғарыш өнеркәсібі қызметін дамыту және тұрақтылығын қамтамасыз ету және оның кадрлық әлеуетін нығайту мақсатында зымыран-ғарыш саласы кәсіпорындарының басым бөлігін біріктіру жоспарлануда», - атап өтілген РФ Үкіметінің сайтында орналастырылған құжатқа анықтамада.
