ДЗЮДО: Бауыржан Жауынтаев - Еуропа кубогының иегері!
ҚЫЗЫЛОРДА. ҚазАқпарат-Түркияның Анталия қаласында өткен дзюдодан жасөспірімдер арасындағы Еуропа кубогында қызылордалық Бауыржан Жауынтаев жеңіс тұғырынан көрінді. 60 келі салмақта өнер көрсеткен Бауыржан 6 кездесуде де қарсыластарын айқын басымдықпен жеңіп, Еуропа кубогының иегері атанды, деп хабарлайды облыстық дене шынықтыру және спорт басқармасының баспасөз қызметінен.
Жас та болса өзінің еңбекқорлығының арқасында үлкен табыстарға қол жеткізіп келе жатқан Бауыржанды білікті де білімді маман Қален Қалиұлы жаттықтырады. Енді Бауыржан үстіміздегі жылдың 3-10 сәуір аралығында Ресейдің Тверь қаласында болатын Еуропа кубоына қатысады. Одан кейін тағы да екі Еуропа кубогында бақ сынап, биылғы жылы Қытайдың Нанджинг қаласында өтетін жасөспірімдер Олимпиада ойындарында Еліміздің намысын қорғамақ.
