Е.Ыдырысов: Қазақстандағы Төмен байытылған уран банкі жаһандық ядролық қауіпсіздікті нығайтуда ауқымды үлес қосады

АСТАНА. ҚазАқпарат - МАГАТЭ-нің (Атом энергетикасы жөніндегі халықаралық агенттік) Төмен байытылған уранның банкі атом энергетикасының бейбіт түрде дамуына қызмет етеді. Бұл туралы бүгін аталған банкті құру туралы келісімге қол қойылғаннан кейін Қазақстан атынан ҚР Сыртқы істер министрі Ерлан Ыдырысов мәлім етті.

«Біз жаңа ғана әлемдік ауқымдағы оқиғаға куәгер болдық, себебі банкті құру қауіпсіздіктің бірегей тетігі болғандықтан, ол тарихи маңыздылықа ие. Банк МАГАТЭ мүшелігіндегі елдер үшін төмен байытылған уранға кепілдік беретін бірегей тетік. Төмен байытылған уран банкі атом энергетикасының бейбіт түрде дамуына қызмет етеді және жаһандық ядролық қауіпсіздікті нығайтуда айтарлықтай ауқымды үлес қосады», - деді министр. Осы орайда Е.Ыдырысов бүгін бекітілген тарихи келісімге қол жеткізу үшін жүргізілген келіссөздерге үлкен кемеңгерлік, батылдық, күш-жігер жұмсалғанын қадап айтты. Бұдан бұрын хабарланғандай, бүгін Астанада Қазақстан Үкіметі мен Атом энергетикасы жөніндегі халықаралық агенттік (МАГАТЭ) еліміздің аумағында Төмен байытылған уранның банкін құру туралы келісімге қол қойылды. Атап айқанда, банк ШҚО-дағы Үлбі металлургиялық зауытының аумағында орналасады. Онда атом энергетикасының қажеттілігі үшін пайдаланылатын төмен байытылған уран сақталады.