Ел мектептерінде орын тапшылығы қалай шешіліп жатыр
АЛМАТЫ. KAZINFORM — 2024 жылы елімізде 373 мың оқушы орнына арналған 257 мектеп салынды. Биыл 300 мың орындыққа арналған 200-ге жуық мектептің құрылысы жүреді.
— Мемлекет басшысы бастамашылық еткен «Жайлы мектеп» ұлттық жобасы аясында оқу жылының басынан 254 мың оқушы орнына арналған 105 мектеп пайдалануға берілді, оның 40%-дан астамы ауылдық жерлерде орналасқан. Білім беру инфрақұрылымын қолдау қоры арқылы 27 мың оқушы орнына арналған 25 мектеп ашылды. Биыл қосымша бес мектеп пен 3,3 мың орындық интернат құрылысы жүріп жатыр, — деп жауап берді Бұл туралы Оқу-ағарту министрлігі Kazinform агенттігінің жолдаған сауалына.
Министрліктен атап өткендей, білім беру нысандары құрылысының басым бөлігі Жетісу, Қызылорда, Батыс Қазақстан, Ақмола облыстарында және Алматы қаласында жүріп жатыр.
Бұл жобаларды іске асыру оқушы орындарының тапшылығын қысқартуға, сондай-ақ апатты ғимарат мәселесін шешуге мүмкіндік береді.
— Барлығы жемқорлардан тәркіленген қаражат есебінен жалпы саны 100 мың оқушы орындық 89 мектептің құрылысы қаржыландырылды. Осы жылы елімізде 300 мың орындық 200-ге жуық мектептің құрылысы жүреді. Бұл шаралар 2026 жылға дейін оқушы орнының тапшылығын толықтай жоюға мүмкіндік береді, — деп хабарлады министрліктен.
Осыған дейін Мемлекет басшысының тапсырмасымен Алматыда алғашқы ұлттық мектептің құрылысы басталғанын жазғанбыз.
