Ел өңірлерінен жиналған 200 ұстаз интеллектуалды сайыста сыналады

АСТАНА. KAZINFORM – Елордада тұңғыш рет «Оқу және математикалық сауаттылық: табысты синергия» тақырыбында республикалық интеллектуалды сайысы өтіп жатыр.

Байқауға өңірлерде жүзден жүйрік шыққан 100 қазақ тілі мен әдебиеті және 100 математика пәні мұғалімі келген. Сайыс, түсініп оқу, логикалық ойлау, дәл есептеу бағыттары бойынша өтіп жатыр. 

- Қазақ тілі мен әдебиеті және математика пәні мұғалімдері арасындағы бұл байқау республикалық деңгейде тұңғыш рет өтіп жатыр. Жалпы функционалдық сауаттылық мәселесі - орта білім беру саласындағы білім сапасын көтеру мақсатында 2016 жылғы реформа негізінде енгізілген үлкен бағыт. Соның нәтижесінде жақсы ілгерлеушілік бар. Мысалы, математикалық сауаттылықтан Қазақстан оқушылары 83 мемлекет қатысқан әлемдік байқауда 50-ші орын, оқу сауаттылығынан 64-ші орын алды. Сондықтан балалардың оқу сауаттылығы тікелей білім сапасына әсер ететін дағды болғандықтан, Оқу-ағарту министрлігі оқу сауаттылығына ерекше мән беріп отыр. Оқушы тапсырманы жақсы түсіну үшін, алдымен оның мәтінін анық түсінуі керек. Балаларды соған дағдыландыру үшін, алдымен педагогтерді шыңдап шығуымыз қажет. Сол мақсатпен министрлік педагогтердің біліктілігін арттыру жұмысында да оқу сауаттылығына, математикалық сауаттылығына басымдық беріп жүр. Міне осыдан кейін оқу және математикалық сауаттылық екеуі қосылғанда табысты синергия беру керек деген ой туды, - дейді Оқу-ағарту министрлігі Орта білім беру комитетінің төрағасы Қаныбек Жұмашев.

Айта кетейік, келесі оқу жылынан бастап бастауыш және орта сынып оқушылары жаңа білім стандартына көшеді.