Елдегі банктерге «ислам терезесін» ашуға рұқсат беретін заң жобасы тамызда Парламентке түседі

АСТАНА. KAZINFORM – Қазақстанның банк жүйесіндегі ислам банктерінің жиынтық үлесі 0,4 пайыз ғана. Қаржы нарығын дамыту және реттеу агенттігі басқарма төрағасының орынбасары Нұрлан Әбдрахманов Сенатта өткен Үкімет сағатында осындай дерек келтірді.

- Бүгінгі таңда елімізде ислам банктерін ашып, жұмыс істеуге заңнамада жағдай жасалған. Бірақ өкінішке қарай, олардың бүкіл банктер активінде үлесі төмен екенін айтуға мәжбүрмін. Бізде екі ислам банкі бар – Al Hilal Bank және Zaman Bank. Олардың бүкіл банктер жүйесінің активіндегі үлесі 0,4 пайыз ғана. Бұл құралды дамыту үшін не істеу керек? Тіпті ислам мемлекеттерінің өзінде ислам қаржысы дәстүрлі банк бизнесімен параллельде жұмыс істейді. Осыған байланысты Мемлекет басшысының тапсырмасымен Банк ісі және қызметі туралы жаңа жаң әзірлеп жатырмыз. Осы тамыз айына қарай Парламент қарауына түсуі керек. Осы құжатта дәстүрлі банктерден «ислам терезесін» ашуға мүмкіндік беретін нормалар ұсынып отырмыз, - деді ол сенаторлардың сұрағына жауап бере отырып.

Айтуынша, бұл норма Қазақстанның жергілікті коммерциялық банктеріне пайыздық несие де, ислам шарты бойынша пайызсыз несие де беруге мүмкіндік ашады.

- Бұл ислам шартымен қаржыландырудың ауқымын кеңейтеді. Екінші жағынан біз елімізге ислам банктерінің көбірек келуін күтіп отырмыз. Өйткені жаңа заң ислам шартымен жұмыс істейтін қаржы институттарының елде бөлімшелерін ашып, жұмыс істеуіне жағдай жасайды, - деді агенттік төрағасының орынбасары.

Еске салсақ, 2024 жылдың аяғында «Отбасы банк» «пайызсыз» ипотекаға Ислам банктерінің қаржысын тартуы мүмкін екені айтылған еді.