Елордада тәуелсіздік тарихынан сыр шертетін фотокөрме ашылады
АСТАНА. 19 қараша. ҚазАқпарат - 1 желтоқсан - Қазақстан Республикасының Тұңғыш Президенті күні. Осыған орай Астана қаласында ұйымдастырылып жатқан мерекелік іс-шаралар жетерлік. Солардың бірі - Тәуелсіздік сарайында өтетін фотокөрме.
Астана қаласы әкімдігінің ресми сайтынан хабарлағандай, бұған арқау болған белгілі фототілші Шүкір Шахайдың «Елін сүйген, елі сүйген Елбасы» және Владимир Куриловтың «Астана - Елбасының тарихи ерлігі» атты еңбектері. Осыған орай ұйымдастырылған баспасөз мәслихатында фотографтар өздерінің таңдаған тақырыптары туралы тарқатып айтып берді.
Владимир Курилов, фотограф:
«Астананың бой көтеруі расында да үлкен тарихи ерлік болды. Өйткені, мұндай ерлікке бару кез келген адам емес, кез келген мемлекет басшысының қолынан келе бермейді деп ойлаймын. Астана - ұлт болашағы, мемлекеттің бет-бейнесі».
Барлық саналы ғұмырын елінің тарихи кезеңдері мен танымал тұлғаларын суреті арқылы танытуға арнап келе жатқан фотограф «бұл көрмеге қойылған жұмыстар бар еңбегімнің 10 пайызы ғана» деп отыр. 150-ге жуық суреттің ішінен Ақорда, Хан Шатыр сауда ойын-сауық орталығы, Бәйтерек монументі сынды елорданың күндізгі, түнгі келісті келбетін көруге болады. Келем деушілерге 16 қараша мен 5 желтоқсан аралығында Тәуелсіздік сарайының есігі ашық.
