ЕО Орталық Азиямен ынтымақтастықты 4 бағыт бойынша ілгерілетпек - Урсула фон дер Ляйен
САМАРҚАНД. KAZINFORM – Еуропа Одағы Орталық Азиямен ынтымақтамтықты 4 негізгі бағыт бойынша ілгерілетуге мүдделі, деп хабарлайды Kazinform агенттігінің меншікті тілшісі Әлихан Асқар.
Бұл туралы «Орталық Азия – Еуропа Одағы» саммиті аясында өткен баспасөз мәслихатында Еуропалық комиссия президенті Урсула фон дер Ляйен мәлім етті.
Ынтымақтастықтың бірінші бағыты - көлік дәліздерін дамыту. Урсула фон дер Ляйен атап өткендей, Еуроодақ Транскаспий көлік дәлізіне 10 млрд еуро бөлуге ниетті. Қаражат қос өңір арасындағы жүк тасымалы уақытын 15 күнге дейін қысқартуға мүмкіндік беретін жобаларды іске асыруға бағытталады.
- Транскаспий көлік дәлізі Орталық Азияның 5 елімен Еуропа арасындағы байланысты нығайта түсеріне сенімдімін, - деді Урсула фон дер Ляйен баспасөз мәслихатында.
Екінші бағыт маңызды минералдар төңірегіндегі жобаларға қатысты. Бұл ретте Еуропалық комиссия президенті пайдалы қазба байлықтарын өндірумен шектелмек, жергілікті өнекәсіпті дамытуға көмек көрсетілетінін айтты.
- Еуропа Одағы жергілікті өнеркәсіпті дамытуға және аймақта дайын тауар шығаратын кәсіпорындар құру бойынша көмек көрсетеді. Тиісінше, жаңа жұмыс орындары құрылып, экономика өркендейді, - деп тоқталды.
Ынтымақтастықтың үшінші бағыты - жасыл энергия. Урсула фон дер Ляйеннің айтуынша, Орталық Азия елдері ішкі және сыртқы сұранысты жабуға жететін экологиялық таза энергия өндіріп жатыр.
Ал Еуропалық комиссия президенті тоқталған төртінші бағыт - спутниктік интернетті дамыту. Еуроодақ келер жылдары Орталық Азиядағы 1700 елді мекенді интернетпен қамтуды жоспарлап отыр.
- Самарқанд саммиті Орталық Азия мен Еуропа Одағы арасындағы қарым-қатынастың жаңа тарауын ашты. Осылайша, біз стратегиялық серіктестікті бүгіннен бастаймыз, - деп түйіндеді Урсула фон дер Ляйен.
Айта кетейік, бүгін Өзбекстанның Самарқанд қаласында «Орталық Азия - Еуропа Одағы» форматындағы алғашқы саммиті өтті. Оның барысында Мемлекет басшысы Қасым-Жомарт Тоқаев бірқатар бастама көтерді.
