Еркін күрес: Мейрамбек Қартбай Париж Олимпиадасының ширек финалына шыға алмады

ПАРИЖ. KAZINFORM – Еркін күрестен Қазақстан командасының мүшесі Мейрамбек Қартбай Париж Олимпиадасының ширек финалына өте алмады.

57 келіде сынға түскен Қартбай алғашқы белдесуде қырғыз балуаны Бекзат Алмазуулымен кім мықтыны анықтаған. Өкінішке қарай, отандасымыз 1:4 есебімен қарсыласқа жол берді. 

Бұл жұптың мықтысы енді ширек финалда АҚШ немесе Қытай спортшысымен кім мықтыны анықтайды. Жарысты ары қарай жалғастыру үшін Мейрамбек Қартбай қырғыз балуанының финалға дейін сүрінбеуін күтеді. 

Айта кетейік, Мейрамбек биыл Бішкектегі Азия чемпионатында қола жүлдегер атанған. 

Еске сала кетейік, грек-рим күресінен 77 келіге дейінгі салмақта бақ сынаған Демеу Жадыраев Париж Олимпиадасының күміс жүлдегері атанған еді.

Айта кетейік, әзірге Қазақстан құрамасының қоржынында 1 алтын, 3 күміс, 3 қола жүлде бар.

Франция астанасы Париж қаласында өтіп жатқан XXXIII жазғы Олимпиада ойындары 11 тамызда мәресіне жетеді. Ойындарға әлемнің 205 елінен 10 500 спортшы қатысып жатыр. Олимпиадашылар 32 спорт түрінен 329 медаль жиынтығын сарапқа салып жатыр.