Еуроодақ Сирияда жаңа үкіметтің құрылуын құптайды

АСТАНА. KAZINFORM — Еуропалық Одақ Сирияда жаңа өтпелі үкіметтің құрылуын құптайды, деп хабарлайды Kazinform меншікті тілшісі.

ЕССҚ мәлімдемесінде ЕО Сириядағы жаңа үкіметпен «оның алдында тұрған үлкен қиындықтарды жеңуге көмектесу» үшін жұмыс істеуге дайын екені айтылған.

— Жақында Сирия бойынша IX Брюссель конференциясында баса айтылғандай, барлық сириялықтың армандары жүзеге асуы керек. Еуропалық Одақ Сирия халқына қолдау көрсетеді, сонымен бірге жаңа үкімет бейбіт және инклюзивті өтпелі кезеңге қатысты өзінің міндеттемесін қамтамасыз ететін болады, — делінген мәлімдемеде.

Еуропалық Одақ Сирия қоғамының барлық құрамдас бөліктерін қамтитын, жан-жақты өтпелі әділеттілік барлық қылмыс үшін жауапкершілікті қамтамасыз ететін және ұлттық бітімге елеулі үлес қосатын, Сирияның басқаруындағы, Сирияның меншігіндегі бейбіт өтпелі үдерісті мызғымас қолдайтынын қайталайды. Бұл тұрғыда 25 ақпанда өткізілген Ұлттық диалог конференциясында басталған үдеріс шешуші рөл атқарып отыр. 

Сондай-ақ барлық сыртқы күштердің Сирияның бірлігі, егемендігі мен аумақтық тұтастығын толық құрметтеуі өте маңызды. ЕО дипломатиялық қызметінің мәлімдемесінде айтылғандай, ол елдегі тұрақтылыққа және бейбіт және инклюзивті саяси ауысу перспективаларына нұқсан келтіруге бағытталған кез келген әрекетті айыптайды.

Бұған дейін Германия сириялықтарға көмек ретінде 300 миллион еуро бөлуді уәде еткенін жазған болатынбыз.