Еуропа лигасында «Ружембероктан» жеңілген «Тобыл» Конференция лигасына түсіп қалды

АСТАНА. KAZINFORM - Бүгін, 18 шілдеде Қостанайдың «Тобылы» футболдан Еуропа лигасы бірінші іріктеу кезеңінде өз алаңында Словакияның «Ружемберок» командасымен кездесті.

Алғашқы ойында қостанайлық клуб қарсыласына 2:5 есебімен жеңіліп қалған еді. Сондықтан бүгінгі кездесуде олар кем дегенде үш доп айырмасымен жеңіске жетуі тиіс еді. Мұндай жағдайда екі ойынның нәтижесі бойынша жеңімпаз қосымша кезеңде немесе пенальтилер сериясы арқыоы анықталатын.

Соны түсінген қостанайлық футболшылар алғашқы минуттан қарсылас команда қақпасына лап қойды. Нәтижесінде жылдам гол соғып үлгерді. Ойынның 8-минутында Ахмед Эль Мессауди өз мүмкіндігін мүлт жіберген жоқ. 

Қостанайлық команданың бұдан кейін де есепті ұлғайтуға күш салды. Десе де бірінші кезеңде бұл дегеніне жете алған жоқ.

Екінші кезең де «Тобылдың» басымдығымен өтті. Қос қанаттан жиі шабуыл ұйымдастырды. Соған қарамастан шабуылды түйіндейтін сәтте дәлдік жетіспей жатты.

Осылайша «Тобыл» қарсыласынан 1:0 есебімен басым түскенімен Еуропа лигасындағы жарыс жолын аяқтады. Енді олар Конференция лигасы екінші іріктеу кезеңінде сынға түседі. 

Енді сағат 23:50-де УЕФА Конференция лигасының бірінші іріктеу кезеңі аясында «Ақтөбе» сырт алаңда босниялық «Сараево» командасымен кездеседі. Ойын «Qazsport» телеарнасынан тікелей эфирде көрсетіледі.

Айта кетсек, елордалық «Астана» жарысты Конференция лигасы екінші іріктеу кезеңінен бастайды.

Еске салсақ, бұдан бұрын Чемпиондар лигасы бірінші іріктеу кезеңінде шымкенттік «Ордабасы» Молдованың «Петрокуб» клубына (0:0, 0:1) жол берді.