Еуропалық кеңес президенті «Орталық Азия – Еуропа Одағы» саммитіне жоғары баға берді

САМАРҚАНД. KAZINFORM – «Орталық Азия – Еуропа Одағы» саммиті аясында ұйымдастырылған баспасөз мәслихатында Еуропалық кеңес президенті Антониу Кошта екі өңірдің ынтымақтастығына қатысты пікір білдірді, деп хабарлайды Kazinform агенттігінің меншікті тілшісі Әлихан Асқар.

- Орталық Азия мен Еуропа Одағын тек сауда-экономикалық ынтымақтастық байланыстырмайды. Біздің тарихымыз терең, сондай-ақ мәдени-гуманитарлық салалардағы ықпалдастығымыздың орны ерекше, - деп мәлім етті Антониу Кошта.

Ол Орталық Азияда және Еуропада тұрақтылықты сақтап, ықтимал қатерлерге қарсы тұру үшін бірлескен жұмыс қажет екеніне тоқталды.

- Осы орайда Самарқанд саммитін өткізудің маңызы зор. Бұған дейін қос өңір арасындағы қарым-қатынас мұндай жоғары деңгейге жетпеген еді. Сондықтан бұл саммит барлық саладағы ынтымақтастыққа серпін беретіні сөзсіз. Мұны жаңа қарым-қатынасқа аяқ басқан кезең деп атаса болады, - деп түйіндеді Еуропалық кеңес президенті.

Айта кетейік, бүгін Өзбекстанның Самарқанд қаласында «Орталық Азия - Еуропа Одағы» форматындағы алғашқы саммиті өтті. Оның барысында Мемлекет басшысы Қасым-Жомарт Тоқаев бірқатар бастама көтерді.