Еуропалық бизнес қауымдастығы Қазақстандық сақтандыру компаниясын үздік деп таныды
АЛМАТЫ. 15 мамыр. ҚазАқпарат - «БТА сақтандыру» АҚ-ы Еуропалық бизнес қауымдастығы тағайындаған «Үздік кәсіпорын» деп аталатын халықаралық марапатқа ие болды.
Компанияның баспасөз қызметінің хабарлауынша, Басқарма төрағасы Сергей Лаврентьевке «Жылдың топ-менеджері» құрметті атағы берілген.
Еуропалық бизнес қауымдастығы (Europe Business Assembly (EBA) тәуелсіз халықаралық корпорациясы Ұлыбританиядағы Оксфордта орналасқан. Оның негізгі қызметі экономикалық, әлеуметтік және гуманитарлық ынтымақтастықты дамыту. ЕБҚ-ның бұл марапаты жетекші және барынша бәсекеге қабілетті компанияларға дамудағы жоғары көрсеткіштері үшін беріледі. Онда үздіктер ақпараттық және рейтингтік агенттіктердің статистикалық және консалтингтік деректері бойынша анықталады.
«БТА сақтандыру» АҚ-ы 2011 жылы сақтандыру сыйақысын жинауды 2 есе ұлғайтып, 4 811 миллион теңгеге дейін жеткізді. Активінің көлемі 27 663 миллион теңгеге жетіп, өсу қарқыны 5 пайызды құрады. Жеке капиталы 5 пайызға өсіп, 22 469 миллион теңгеге дейін ұлғайды. Ол сақтандыру нарығында актив көлемі бойынша төртінші, ал капитал көлемі бойынша үшінші орын алады. Компания жоғары жетістіктері үшін былтыр сондай-ақ, Ұлыбританияның World Finance Magazine журналының нұсқасы бойынша «Үздік сақтандыру компаниясы» марапатына ие болған болатын.
