Франция тарихындағы ең қысқа мерзім: премьер 27 күннен кейін отставкаға кетті
АСТАНА. KAZINFORM — 6 қазан күні таңертең Елисей сарайында Франция премьер-министрі Себастьен Лекорню отставкаға кету туралы өтініш берді.
Le Figaro басылымының жазуынша, президент Эмманюэль Макрон оның отставкасын қабылдады. Лекорню Францияның премьер-министрі болып 9 қыркүйекте ғана тағайындалды, ол небәрі 27 күн қызмет атқарған. Бұл оны ел тарихындағы ең қысқа мерзім жұмыс істеген премьер-министр етіп отыр.
Лекорню жексенбі күні кешке жариялаған жаңа команда барлық жағынан сынға ұшырады.
Француз ақпарат құралдарының хабарлауынша, бұған шешімнің алдында министрлер кабинетін өзгертуге күш салу ниетін мәлімдеген бірнеше оппозициялық партияның сенімсіздік вотумы туралы қорқытуы түрткі болған. Елисей сарайы үкімет басшысының міндетін кім атқаратынын әлі жариялаған жоқ.
Еске сала кетсек, қатаң экономикалық үнемдеу жоспарына байланысты туындаған даулы жағдай салдарынан 8 қыркүйекте Франция парламентінің төменгі палатасы премьер-министр Франсуа Байруды қызметінен босатты.
Айта кетейік, Франсуа Байру 2024 жылғы желтоқсанда премьер-министр болып тағайындалып, үш айдан кейін сенімсіздікке ұшыраған Мишель Барнье орнына келді.
Бұған дейін Францияда мыңдаған адам бюджетті үнемдеу шараларына қарсы шыққанын жазған болатынбыз.
