Футболдан ӘЧ-2022: Қазақстан құрамасының қарсыластары тең түсті

НҰР-СҰЛТАН. ҚазАқпарат - Футболдан 2022 жылғы әлем чемпионатына іріктеу сатысында Қазақстан құрамасы сынға түсетін D тобында тағы бір кездесу аяқталды, деп хабарлайды ҚазАқпарат тілшісі.

Өз алаңында Украина құрамасы Финляндиямен шеберлік байқасты. Екеуі де алғашқы турда тең нәтижеге қанағат білдірді. Украиналықтар сырт алаңда Франциямен 1:1, Финляндия өз алаңында Босния және Герцоговинамен 2:2 есебімен тең түсті.

Сондықтан бүгінгі ойында қос құрама жеңіске жету жолын іздеді. Десе де бірінші кезеңде қос қарсылас бір-бірінің қақпасынан саңылау таба алған жоқ.

Екінші кезеңде де ойын алма-кезек шабуылмен өрбіді. Нәтижесінде 80-минутта украина құрамасы сапынан Жуниор Мораес есеп ашса, финляндиялық Тезму Пукки 89-минутта пенальтиден гол соқты. Осылайша кездесу 1:1 есебімен тең аяқталды.

Екі турдан кейін Франция құрамасы төрт ұпаймен көш басында тұр. Одан кейінгі орындардағы Украина мен Финляндияның еншісінде екі-екіден ұпай болса, Босния және Герцоговина әзірге бір ұпайды місе тұтқан. Ал Қазақстан әзірге ұпай еншілеген жоқ.

Естеріңізге сала кетелік, бүгін аталған топта Қазақстан өз алаңында Франциядан 0:2 есебімен жеңіліп қалды.

Енді 31 наурызда бұл топта тағы екі ойын өткізіледі. Өз алаңында Украина Қазақстанды қабылдаса, Босния және Герцоговина Франциямен шеберлік байқасады.