Футболдан Қазақстан құрамасы өзбекстандық клубпен тең түсті

АСТАНА. KAZINFORM - Футболдан Қазақстан ұлттық құрамасы Түркиядағы оқу-жаттығу жиыны аясында бүгін Өзбекстанның «Локомотив» (Ташкент) клубымен тең ойнады.

Кездесу барысында алғашқы голды қызылордалық «Қайсар» командасының шабуылшысы Айбар Жақсылықов соққан еді. Оған өзбекстандық клуб пенальтиден бір голмен жауап қайырды.

Осылайша, қазақстандық футболшылар қарсыласымен 1:1 есебімен тең түсті.

Енді ел құрамасы 17 ақпанда Солтүстік Кореямен (КХДР) жолдастық кездесу өткізеді. Матч Қазақстан уақытымен 19:00-де басталады.

Оқу-жаттығу жиыны Түркияның Белек қаласында 18 ақпанға дейін өтеді. Жиынның негізгі мақсаты - ұлттық құрамаға үміткерлерді қарау. Сондықтан бапкерлік штаб аталған жиынға ұлттық құрамаға үміткерлер мен жас ойыншыларды шақырды.

Айта кетсек, Қазақстан құрамасы 2026 жылғы Әлем чемпионатының іріктеу турнирінде Уэльс, Лихтенштейн, Солтүстік Македония және Бельгия командаларымен бірге J тобына түсті.

Осыған дейін футболдан Қазақстан құрамасы Түркияда оқу-жаттығу жиынын өткізетіні туралы хабарлаған едік.