Газа секторынан тағы 6 әйел мен 24 бала әкелінеді ? ҚР Сыртқы істер министрлігі
АСТАНА. Қаңтардың 12-сі. ҚазАқпарат /Гүлмира Әлиакпарова/ - Израиль-палестин қақтығысы орын алып отырған Газа секторында бүгінгі күні Қазақстанның 16 әйел азаматы мен олардың 41 баласы бар.
Бұл туралы бүгін өткен брифингте ҚР Сыртқы істер министрлігінің ресми өкілі Ержан Ашықбаев мәлім етті, деп хабарлайды ҚазАқпарат. Оның атап көрсеткеніндей, олардың ішінде 6 әйел мен олардың 24 баласы елге оралуға ниет білдірген. Бұл Палестина автономиясының азаматтарына тұрмысқа шыққан қазақстандық азаматшалар. Сондай-ақ, Газа секторының қақ ортасында тұрып жатқан 1 отбасы Қазақстанға келуден бас тартты. Өйткені бұл аймақтан шыққаннан кейін олардың өз еліне қайта оралуы қиынға соқпақ. «Үстіміздегі қаңтардың 8-інде ТМД азаматтарын Газа аймағынан алып кету шараларының екінші кезеңі басталды. Бірақ, Газада әскери қақтығыстардың өршуіне байланысты бұл елден қанша қазақстандық азаматтың шығарылатынын нақтылап айту қиынға соғып отыр», - деді ол.ҚР Сыртқы істер министрлігі қазақстандық азаматтарға көмек қолын созу мақсатында тікелей телефон желісін (87172 72 04 68, 72 04 86) орнатты. Естеріңізге сала кетейік, бұған дейін Газа секторынан Қазақстанның 7 азаматы (2 әйел мен 5 бала) әкелінген болатын.
