Германия Парламенті қорғаныс шығындарын ұлғайту туралы тарихи шешім қабылдады

АСТАНА. KAZINFORM – Бундестаг Фридрих Мерцтің қорғаныс пен инфрақұрылымға миллиардтаған еуро бөлу жоспарын мақұлдады. Құжат 513 дауыс жинады (қажеттісі – 489), деп хабарлайды Euronews.

Енді заң жобасы 21 наурызда Бундесратта дауыс беруден өтуі керек.

Құжатқа сәйкес, ЖІӨ-нің 1%-ынан асатын қорғаныс шығындары бұдан былай «қарыз тежеу» ережесіне жатпайды. Бұған дейін бұл шектеу 0,35% ЖІӨ деңгейінде болған.

Бұған дейін Мерц «жасылдар» партиясымен мемлекеттік қарызға қойылған шектеулерді тек қорғаныс үшін ғана емес, сонымен қатар азаматтық қорғаныс пен барлау саласы үшін де жұмсарту туралы келісімге келген еді. Сондай-ақ, ол инфрақұрылым қорларының бір бөлігін климатты қорғауға бағыттауға келісті.

Фридрих Мерц коалициялық келіссөздерді католиктердің Пасха мейрамы қарсаңында, яғни 20 сәуірге дейін аяқтауды жоспарлап отырғанын мәлімдеді.

Германияда партиялар коалициялық келіссөздерді бастауға келісті.