Халықаралық олимпиадада ең мықтылар бақ сынауда - Қырғызстаннан келген қатысушы

АЛМАТЫ. ҚазАқпарат - Алматыда өтіп жатқан Информатикадан халықаралық олимпиада əлемдегі кіл мықтылардың басын қосты. Қырғыз Республикасынан келген қатысушы Қадырбек Нармаматов "ҚазАқпарат" тілшісіне білім байқауы туралы ойын жеткізді.

"Сайыс оңай болмайтыны анық. Жаттығу тапсырмаларының өзі оңай шағылатын жаңғақ болмады. Қарсыластарымыз да оңай алынатын қамал емес. Қазір бірдеңе айту қиын. Ертеңгі күн бəрін көрсетеді", -деді К.Нармаматов.

Қатысушы қиын болса да жүлдесіз кетпеуді діттеп отыр.

"Мен үшін Олимпиаданың маңызы өте зор. Біз тек қана білімімізді сынамаймыз. Мұнда көптеген білімді адамдармен танысып, тəжірибе алмасарымыз анық",- деді қатысушы.

Алматыда басталған халықаралық олимпиадаға 86 елден 630 делегат келді. Халықаралық байқау əл-Фараби атындағы Қазақ ұлттық университетінде өтеді. Ашылу салтанаты бүгін 15.00-де Ө.Жолдасбеков атындағы оқушылар сарайында болады.