ХАМАС соғысты тоқтату үшін барлық тұтқынды босатуды ұсынды

АСТАНА. KAZINFORM - ХАМАС ұзақ мерзімді бітімге келу және қоршаудағы анклавтан Израиль әскерін толық шығару үшін Газа секторында қалған барлық тұтқынды бірден босатуды ұсынды, деп хабарлайды Kazinform тілшісі.

ХАМАС өкілі Хазем Касем атысты тоқтату келісімінің екінші кезеңіне қатысты көзқарасын айтты, деп хабарлайды AlJazeera.

— Біз тұрақты атысты тоқтатуға және Газа секторынан әскерлерді толықтай шығаруға әкелетін келісімге келу аясында тұтқын айырбастаудың екінші кезеңіне дайынбыз, - деді Касем.

Палестина тобы да Израильдің қарусыздану және Газа секторынан шығу туралы үндеуін қабылдамады. 

— ХАМАС-ты (Израиль) Газа секторынан ығыстыру — психологиялық соғыс, - деп қосты Касем.

Қасем сондай-ақ топтың келесі алмасуы болатын 22 ақпанда, сенбіде босатылатын тұтқындар санын үштен алтыға дейін көбейту туралы шешіміне түсінік берді. Бұл шешімді ХАМАС жетекшісі Халил әл-Хайя бір күн бұрын келісімнің екінші кезеңін жүзеге асыруды тездетуге тырысу мақсатында жариялады.

— Бостандыққа шығарылатын тұтқындар санын екі есеге арттыру келісімнің барлық шарттарын орындаудағы байсалдылығымызды дәлелдеу үшін жасалды, - деді Касем.

Өткен аптада ХАМАС Израильдің жылжымалы үйлер мен техника әкелуге рұқсат беруден бас тартқанын, сондай-ақ келісімнің басқа да бұзылуын, соның ішінде палестиналықтарға жасалған шабуылдарды алға тартып, босатуды кейінге қалдырамыз деп қорқытқан болатын. 

Бұған дейін ХАМАС Газа билігін Палестина ұлттық билігіне беруге дайын екенін жазғанбыз.