Илон Маск үкіметтің БАҚ-қа жұмсайтын шығынын қысқартпақшы

АСТАНА.KAZINFORM - АҚШ-тың Үкімет тиімділігі департаменті (DOGE) жүргізіп жатқан үнемдеу саясаты аясында бірқатар америкалық БАҚ-ты мемлекеттік қаржыландырудан бас тартады, деп хабарлайды Kazinform-ның меншікті тілшісі.

Ақ үйдің баспасөз хатшысы Кэролайн Ливитттің мәлімдеуінше, Politico бұдан былай салық төлеушілердің қаражатынан бір цент те алмайды. Бұл шешім басылымның жазылым мен басқа да мемлекеттік келісімшарттар арқылы 8,4 миллион доллар алғаны анықталғаннан кейін қабылданды.

Кэролайн Ливитт DOGE командасы қазір бұл төлемдерді тоқтату бойынша жұмыс істеп жатқанын және «америкалықтардың мүддесіне қызмет етпейтін» кез келген шығын қысқартылатынын атап өтті.

- Politico мемлекет тарапынан қаржыландырылып келген жалғыз басылым емес, - деп атап өтті Yahoo News.

USASpending.gov мәліметінше Associated Press АҚШ үкіметінен 619,968 доллар, Reuters 3 3,1 миллион доллар, ал The New York Times 3 378 266 доллар алып келген.

Бұл көрсеткіштер Илон Масктың қатаң сынына ұшырады.

- Бұл - салық төлеушілердің қаражатын тиімсіз пайдалану. Пайдасыз шығындар жойылады, - деді ол.

Ол Х желісінде «көптеген бұқаралық ақпарат құралы табыстың жұмбақ құлдырауына тап болады» деп жазды.

Many media outlets are going to experience a mysterious drop in revenue https://t.co/8T2Qrwpcez

— Elon Musk (@elonmusk) February 5, 2025