Индонезиядағы Бромо ұлттық саябағында 120 гектардан астам орман өртенді
АСТАНА. KAZINFORM — Индонезиядағы Бромо-Тенгер-Семеру ұлттық саябағының (TNBTS) кальдерасында бірнеше күннен бері өршіп тұрған орман өрті шамамен 120 гектар аумақты шарпыды, деп хабарлайды БелТА.
TNBTS басқармасының басшысы Рудиджанта Тьяджа Нуграха өртті әуеден сөндіруге арналған тікұшақтың жердегі топтар жете алмайтын тік жартасты жерлердегі ошақтарды сөндіру жұмыстарын жалғастырып жатқанын айтты.
— Әлі де сөндірілмеген бірнеше ошақ бар. Өрт шамамен 120 гектар аумақты шарпыды, — деді Нуграха.
Оның айтуынша, таулы әрі ойлы-қырлы жер өрт сөндірушілер үшін қиындық туғызған. Өрт ошақтарының көбі тік беткейлерде орналасқандықтан, жедел қызметтердің біріккен топтары ол жерлерге жаяу қауіпсіз жете алмайды.
Ол сондай-ақ өрттің табиғи факторлардан емес, адам әрекетінен тұтануы мүмкін екенін айтты.
Айта кетейік, Түркияда 44 орман өртіне қатысты тергеу жүргізіліп, күдіктілер қамауға алынды.
