Испаниядағы тасқыннан қазақстандықтар зардап шеккен жоқ - СІМ

АСТАНА. KAZINFORM – Испаниядағы су тасқынынан зардап шеккендер арасында қазақстандықтар жоқ. Бұл туралы ҚР Сыртқы істер министрлігі хабарлады.

Бұған дейін белгілі болғандай, Испанияның Валенсия аймағында болған су тасқынынан 50-ден астам адам көз жұмды.

Зардап шеккен аудандарда құтқару операциясы жалғасып жатыр, ал қаза тапқандардың нақты санын әзірге анықтау мүмкін емес. Сондай-ақ Альбасете аймағында із-түзсіз жоғалғандар туралы ақпарат бар.

Әлеуметтік желілерде су ағыны көпірлер мен көліктерді шайып жатқанын көрсететін кадрлар жарияланған. Кейбір бейнежазбаларда адамдардың су тасқынынан құтылу үшін ағаштарға өрмелеп жатқаны көрсетілген.