Италия жағалауында заңсыз иммигранттар мінген қайық аударылып қалды
АСТАНА. KAZINFORM – Жерорта теңізінің Лампедуза аралы маңында мигранттар мінген қайық аударылды. Оқиға кезінде бір баланың із-түзсіз жоғалғаны белгілі болды. Құтқару жұмыстары жалғасып жатыр, деп хабарлайды Kazinform Anadolu агенттігіне сілтеме жасап.
ANSA ақпарат агенттігінің хабарлауынша, Италия жағалау күзеті патрульдік қайықтар арқылы құтқару операциясын жүргізіп, 64 адамды аман алып қалды. Олардың арасында 14 әйел мен 10 бала бар.
Оқиға кезінде Сьерра-Леоне азаматы деп болжанған екі жасар бала теңізде жоғалып кеткен. Төңкерілген қайықтың Тунистен шыққаны анықталды.
Кейінгі бірнеше сағат ішінде құтқарылған 64 адаммен бірге Лампедуза аралына келген заңсыз мигранттардың жалпы саны 292-ге жетті.
Италия Ішкі істер министрлігінің мәліметіне сәйкес, 2024 жылдың басынан 13 наурызға дейін теңіз арқылы елге келген заңсыз мигранттардың саны 5 174 адамды құрады. Бұл көрсеткіш өткен жылдың осы кезеңіндегі 8 347 адамнан төмен.
Орталық Жерорта теңізі аймағы Италия, Мальта, Ливия және Тунис арасындағы заңсыз миграцияның негізгі бағыттарының бірі саналады. Бұл маршрут арқылы Еуропаға өтетін мигранттардың алғашқы қону нүктелері – көбінесе Лампедуза аралы мен Мальта.
Жыл сайын көптеген заңсыз мигрант Жерорта теңізін кесіп өтуге тырысып, қолайсыз ауа райынан, қайықтардың аударылуынан және т.б. жайсыз жағдайлардан жапа шегеді. Бұл жағдай миграция мәселесінің күрделілігін көрсетеді.
Бұған дейін хабарлағанымыздай, Италия иммиграциялық саясатты күшейтіп, теңіз блокадасын енгізді.
