Израиль - Қазақстан әскері үшін қару-жарақ жеткізетін негізгі елдердің бірі
АСТАНА. ҚазАқпарат - Израиль, Қытай Халық Республикасы мен Ресей Федерациясы Қазақстан әскері үшін қару-жарақ пен әскери техника жеткізетін негізгі елдер екен. Бұл туралы ҚазАқпарат агенттігінің ресми сауалына жауап бере отырып, ҚР Қорғаныс министрлігінің баспасөз қызметі хабарлады.
«Израиль, Қытай және Ресей Федерациясы Қазақстан армиясы үшін қару-жарақ пен әскери техника жеткізетін негізгі елдер»,-деп хабарланған Қорғаныс министрлгінің жауабында.
Жалпы, баспасөз қызметінің хабарлауынша, Қорғаныс министрлігі қару-жарақ пен әскери техника саласында бірқатар мемлекеттік реттеу шараларын қабылдапты.
«Біріншіден, Қазақстан Республикасы Қарулы күштерінің, басқа да әскерлер мен әскери құрылымдарының жарақтануында тұрған қару-жарақ пен әскери техника туралы мәліметтерді жүйелендіретін ҚР Қарулы Күштерінің, басқа да әскерлері мен әскери құрылымдарының қару-жарағы мен әскери техникасының кадастры әзірленді»,-деп хабарланған жауапта.
Екіншіден, дереккөзіне сүйенсек, Қорғаныс министрі былтыр 21 қаңтарда «Қазақстан Республикасы Қарулы күштерінің, басқа да әскерлері мен әскери құрылымдарын жарақтандыруға қару-жарақ пен әскери техниканы қабылдау қағидаларын бекіту туралы» бұйрыққа қол қойған екен.
«Шет елдерден Қазақстанға қару-жарақ жеткізетін тараптармен іскерлік қарым-қатынас орнататын орган ретінде Қорғаныс министрлігінің жанынан «Қазарнаулыэкспорт» республикалық мемлекеттік кәсіпорны құрылды»,-деп хабарлады Қорғаныс министрлігі.
