Израильдің Газа секторына жасаған шабуылынан қаза тапқандар саны 62 895 адамға жетті

АСТАНА. KAZINFORM – 2023 жылдың 7 қазанынан бері Израиль әскерінің Газа секторына жасаған шабуылдарынан қаза тапқан палестиналықтардың саны 62 895 адамға жетті. Тек кейінгі тәуліктің өзінде эксклавта 76 адам Израиль шабуылдарының құрбаны болды, деп хабарлайды Анадолы ақпарат агенттігі. 

Палестина Денсаулық сақтау министрлігінің Израильдің аймақта жалғасып жатқан шабуылдарынан көз жұмғандар мен жарақат алғандар туралы соңғы мәліметтер ұсынылған ақпарат бойынша, кейінгі 24 сағатта Газа секторындағы ауруханаларға қаза болған 76 адам және жараланған 298 адам жеткізілді.

Израиль әскерінің 19 қаңтарда күшіне енген атысты тоқтату келісімі бұзылған соң 18 наурыздан бері жасаған шабуылдарынан опат болғандар саны 10 050, жарақат алғандар қатары 46 886 адамға жетті. 

Хабарланғандай, кейінгі тәулікте көмек алуға әрекеттенген 18 палестиналық қаза тауып, 106 адам түрлі дене жарақатын алған.

Израиль мен АҚШ басшылығы құрған көмек тарату орталықтары деп аталатын аймақтарда 27 мамырдан бері жүйелі түрде Израиль шабуылдарынан ажал құшқандар саны 2 158 адамға, жараланғандар саны 15 843 адамға жетті.

2023 жылдың 7 қазанынан бері Израильдің Газа секторына жасаған шабуылдарынан қаза тапқан палестиналықтардың жалпы саны 62 895 адамға, жарақат алғандар саны 158 927 адамға жетті. 

Кейінгі тәулікте Газадағы ауруханаларда дұрыс тамақтанбау мен аштықтан 10 адам қайтыс болды, олардың арасында балалар да бар. Осылайша, аштықтан қайтыс болғандар саны 313 адамға жетті, оның ішінде 119-ы – балалар. 

Атап өткеніміздей, Газа секторында мыңдаған құрбанның денесі әлі де үйінді астында қалып отыр. 

Бұған дейін Израильдің Газадағы әуе соққысынан 5 журналист қаза тапқанын жазған болатынбыз.