Канада құрамасы Ресейді ойсырата жеңді
АСТАНА. Ақпанның 25-і. ҚазАқпарат - Ванкувер Олимпиадасында Ресей жанкүйерлерінің хоккейшілерден күткен үміті ақталмады: олар канадалықтардан ойсырай жеңілді, деп хабарлайды РБК агенттігі. Ресейліктер ойын бастала салып, есе жібере бастады - үшінші минутта канадалық Райан Гетцлафф есеп ашты.
Канадалықтар ойынның алғашқы 13 минутына дейін ресейліктерге бас көтертпей, үш гол салды. Содан кейін Ресей құрамасының жаттықтырушысы Вячеслав Быков тайм-аут алды.
Үзіліс Ресей командасына көмектескендей болды. Ойынның 15-ші минутында Дмитрий Калинин есеп ашты, бірақ бұл шайба канадалықтардың екпінін баса алған жоқ. Канадалықтар мықты ойын көрсетіп, ресейліктердің қақпашысы Е.Набоковты тағы қапы қалдырды.
Үзіліске командалар 4:1 есебімен, Канаданың басымдығымен шықты. Ойынның екінші және үшінші кезеңі де канадалықтардың басымдығымен өтті. Өкінішке орай, сенсация болған жоқ. Нәтижесінде, Ресей құрамасы «үйеңкі жапырақтылардан» 3:7 есебімен ойсырай жеңіліп, турнирден шығып қалды.
