Канадалық компания Қазақстанда сирек кездесетін пайдалы қазба өндіруге екінші лицензиясын алды

АСТАНА.KAZINFORM - 6800 гектар аумақты қамтитын лицензия Condor Energies компаниясына сирек кездесетін пайдалы қазбаларды барлауға алты жыл мерзім береді, деп хабарлайды Mining Technology.

Condor Energies – Көлқұдық кен орнын игеруге рұқсат алған канадалық энергетикалық компания. Бұл – канадалықтардың жұмыс істейтін екінші алаңы. Бірінші учаске екіншісінен алыс емес жерде орналасқан, ауданы 37 300 гектар Саяқбай учаскесі. Лицензиялық аумақтардың екеуі де бағалы пайдалы қазбалардың кен орындары бар геотермиялық белсенді аймақта орналасқан.

- Бұл аймақтар Еуропа мен Қытай арасында стратегиялық тұрғыдан маңызды минералдар нарығына тікелей қол жеткізуді ұсынады, - делінген хабарламада.

ҚР Экология және табиғи ресурстар министрлігінің мәліметінше, көмірсутектерді барлауға арналған Көлқұдық лицензиялық аймағында бұрын бұрғыланған ұңғымада литріне 130 мг-ға дейін литий концентрациясы бар тұзды ерітінділер табылған.

Тарихи деректер рубидий, стронций және цезийді қоса алғанда, басқа анықталған минералдары бар тексерілген және тексерілмеген тұзды су қоймаларының 1000 метрлік бағанын көрсетеді.

Қанат Шарлапаев қандай пайдалы қазбалар бойынша геологиялық барлау жүргізу қажеттігін айтқан болатын.