Қарағандылық суретші Кәріпбек Күйіковтің картиналары Нью-Йорк көрермендерін тәнті етті
АСТАНА. KAZINFORM - Нью-Йорк қаласындағы БҰҰ штаб-пәтерінде ядролық қаруға тыйым салу туралы шартқа қатысушы мемлекеттердің конференциясы өтті. Шараға Қарағанды облысының делегациясы да қатысты.
Халықаралық конференция барысында қатысушылар назарына Қарағанды облысы Семей ядролық полигонының құрбаны, әлемге әйгілі суретші Кәріпбек Күйіковтың суреттерінің көрмесін және тарихи-өлкетану музейінің қорларынан «Полигон жаңғырығы» атты фотокөрме ұсынды.
-Біздің отанымыздың өнерін БҰҰ сияқты маңызды халықаралық тұғырнамада таныстыру біз үшін үлкен мәртебе. Біз шығармашылық пен өнер арқылы бейбітшілік пен тұрақтылықтың маңыздылығы туралы, жаһандық қауіпсіздікті қолдаудағы әрбір адамның рөлі туралы мықты хабарлама жеткізуге болатынына сенімдіміз, - деп атап өтті Қарағанды облысының мәдениет, архивтер және құжаттама басқармасының басшысы Еркебұлан Жұмакенов.
Ядролық қаруды таратпау жөніндегі конференция үкімет өкілдерін, ғалымдарды, белсенділер мен азаматтық қоғам өкілдерін қоса алғанда, әлемнің түкпір-түкпірінен жүздеген делегаттарды жинайтын әлемдік аренадағы маңызды оқиға болып табылады.
Қарағанды облысының суреттер көрмесі қатысушылардың назарын тек техникалық мәселелерге ғана емес, сонымен қатар бейбітшілікті сақтау жөніндегі жаһандық күш-жігердің гуманитарлық құрамдас бөліктеріне де аударды.
Кәріпбек Күйіков суреттерінің көрмесі, сондай-ақ мұражай қорларындағы фотокөрме конференция басталғаннан соңғы күнге дейін жұмыс істеп, делегаттар мен халықаралық ұйымдар өкілдерінің назарына қолжетімді болды.
Көрмеге күн сайын 100-ден астам адам келіп, олардың әрқайсысы Кәріпбек Күйіковтің рухына, сондай-ақ Қазақстанның ядролық қаруды таратпау қозғалысына қосқан ерекше үлесіне тәнті болды.
Кәріпбек өз өнерінің арқасында әлемдегі бейбітшілік пен ядролық қарумен күрестің символы болып табылады. Оның өнері жай ғана сурет емес, бұл күрес, үміт, бейбіт өмірге ұмтылу, деп атап өтті Қарағанды облысы мәдениет басқармасында.
Осыған дейін Абай облысында бұрын Семей ядролық полигоны болған кей жерлер әлі күнге дейін қолданысқа берілмей отырғаны жайлы жазған болатынбыз.
