Қармақшы ауданында жыл басынан бері 489 маман қоғамдық жұмысқа тартылды - Қызылорда облысы
ҚЫЗЫЛОРДА. Тамыздың 28-і. ҚазАқпарат /Жаңагүл Сердалы/ - Қызылорда облысы Қармақшы ауданында жыл басынан бері 489 маман қоғамдық жұмысқа тартылып, «Жол картасы» бағдарламасы аясында жастар тәжірибесіне 357 жас жұмыспен қамтылды.
Осы аралықта 234 қармақшылық түрлі әлеуметтік жұмыс орындарына жолдама алып, 1291 жұмыссыз тұрақты жұмысқа орналасты. Соның арқасында жұмыссыздық деңгейі 0,6 пайызды құрап, былтырғы жылдың көрсеткішімен салыстырғанда едәуір төмендеді. Бүгінгі таңда №12 кәсіптік лицейде 6 мамандық бойынша қайта даярлау курстары жүргізілуде. Бұған дейін мұнда 375 адам жаңа мамандық алып, қайта даярлау курстарынан өтті. Аудандағы 103 мекемемен келісім-шарт жасалып, жаңа мамандық иелеріне жолдама берілді.
