Каспий теңізінің тартылуы Орта дәліздің транзиттік әлеуетіне қалай әсер етеді
ТАШКЕНТ. KAZINFORM – Өзбекстандағы Орталық Азия халықаралық институтында Еуропа мен Орталық Азиядағы саяси талдау орталықтарының форумы өтті, деп хабарлайды Kazinform агенттігінің меншікті тілшісі.
Ауқымды іс-шараға еуропалық және өңір елдерінің жетекші сарапшылары мен саясаткерлері қатысты. Аталған форум биыл сәуірде Өзбекстанда өтетін «Орталық Азия – Еуропалық Одақ» форматындағы саммит қарсаңында ұйымдастырылып отыр.
Форумда баяндама жасаған Қазақстанның стратегиялық зерттеулер институтының сарапшысы Орталық Азия мен Еуропалық Одақ елдері ынтымақтастықты тереңдетуге мүдделі екенін атап өтті.
- Самарқанда өтетін «Орталық Азия – Еуроодақ» саммиті қарсаңында сарапшылар өңірлер арасындағы байланыстардың қазіргі ахуалын бағамдап көрді. Тараптар ынтымақтастыққа мүдделі. Қазақстан қос аймақ арасындағы тауар айналымын арттыруда маңызды рөлге ие. Атап айтқанда, Орта дәліздің мүмкіндігін тиімді пайдаланып, еліміздің транзиттік әлеуетін арттыру қажет, - деп тоқталды сарапшы.
Ерлан Жақыповтың айтуынша, бүгінде Орта дәлізді дамыту төңірегінде шешімін таппаған мәселелер де бар.
- Бұл маршрутты дамыту бойынша бірнеше мәселе бар. Атап айтқанда, инфроқұрылымды жетілдіру қажет. Сонымен қатар, қазір Каспий теңізі тартылып барады. Бұл тиімді шешімді қажет ететін мәселе. Оны шешу үшін Орталық Азия мен Еуропалық Одақ елдері сарапшыларының пайымы керек. Өйткені, аталған дәлізде Каспий теңізінің маңызы орасан. Бұған қоса, Транскаспий бағыты бойынша жүретін тауар экспортының уақытын қысқарту үшін кедендік рәсімдеу механизмдерін оңтайландыру орынды, - деді Е.Жақыпов Kazinform тілшісінің сауалына жауап бере отырып.
Орталық Азия халықаралық институтының өкілі Умрбек Юсуповтың пікірінше, бүгінде шиеленіскен геосаяси жағдай өңір елдері мен Еуропалық Одақ арасындағы ынтымақтастықтың маңызын арттыра түсті.
- Әлемде геосаяси жағдай күрделеніп барады. Осы кезеңде Орталық Азия мен Еуропалық Одақ арасындағы ынтымақтастыққа тың серпін беру қажет. Бұған барлық қатысушы тараптар мүдделі. Ташкент осы екі аймақты байланыстыруға мүмкіндік беретін алаң ұсынып отыр. Алда өтетін саммит Орталық Азия елдерінің тұрақты дамуына жол ашады деген сенімдемін, - деді Умрбек Юсупов Kazinform тішісінің сауалына жауап бере отырып.
Форум қорытындысы бойынша сарапшылардың талдауына негізделген ұсыныстар легі әзірленді. Бұл пікірлерді алдағы уақытта Орталық Азия елдерінің үкіметтері шешім қабылдау кезінде басшылыққа алады.
Еске салайық, биыл 3-4 сәуір аралығында Самарқан қаласында Еуроодақ пен Орталық Азия елдері басшыларының алғашқы саммиті өтеді.
