Кәсіпкерлікке кедергі жасаған: Бас прокуратура Алматы облысында тергеу жүргізіп жатыр
ҚОНАЕВ. KAZINFORM - Алматы облысының әкімдігі мен «International Academy of medicine and sciences» ЖШС арасында мемлекеттік-жекеменшік әріптестік келісім арасында дау туындады.
Мәжіліс депутаты Ирина Смирнованың ресми сауалына жолдаған жауабында ҚР Бас прокуратурасы Алматы облысындағы инвестордың мәселесі туралы түсініктеме берген. Ресми мәліметке сәйкес, «International Academy of medicine and sciences» ЖШС Алматы облысының Денсаулық сақтау басқармасынан «Алматы көпсалалы клиникалық ауруханасын» сатып алу құқығынсыз 30 жылға сенімгерлік басқаруға алған.
Компания өз міндетіне сай 4,4 млрд теңгеден астам инвестиция салған. Оның ішінде, 891 млн теңге кредиторлық берешекті өтеген, инфекциялық корпусты салған және орталық сумен жабдықтау құрылысына жоба əзірлеген. Алайда басқарма келісім бойынша өз міндетін атқармаған.
- Мемлекеттік əріптес шарттық талаптарды сақтамай отыр: бір жылдан астам сыйақы төленбеуде, салынған инфекциялық корпус теңгерімге қабылданбаған, инженерлік желілер қосылмаған, - делінген жауапта.
Бас прокуратура мәліметінше, дау облыс əкімінің өкімімен 2022 жылы тамызда инвестордың қаржы-шаруашылық қызметін тексеруге талпынуынан және басқарманың аурухананың бас дəрігерімен еңбек шартын жасауға əрекет етіп, оның қызметін белгілемек болғанынан туындаған.
- 2025 жыл 24 ақпан күні Сыбайлас жемқорлыққа қарсы іс-қимыл агенттігінің Алматы облысы бойынша департаменті басқарманың лауазымды тұлғаларына қатысты Қылмыстық кодекстің 365-бабы 3-бөлігі 2-тармағы (заңды кәсіпкерлік қызметпен айналысуға кедергі жасау) бойынша сотқа дейінгі тергеп-тексеруді бастады, - делінген Бас прокуратура жауабында.
Алматы облысының әкімдігі биыл 6 наурыз күні сот шешімі бойынша нысан аумағында жергілікті атқарушы органы мен компания өкілдері арасында кездесу өткенін хабарлады.
- Келіссөздер барысында тараптар жобаны іске асырудың негізгі мәселелері бойынша келісімге келді. Облыс әкімдігі даулы мәселелерді реттеу үшін шаралар қабылдады. Сонымен қатар Сыбайлас жемқорлыққа қарсы қызмет қылмыстық іс қозғады, сотқа дейінгі тергеу жүріп жатыр, - деп хабарлады облыс әкімдігінен.
Еске салайық, бұған дейін Алматы облысындағы үш ауысымды мектептердің мәселесі туралы жазғанбыз.
