Қазақ пен Қырғыз елі өзара сауда айналымын 1 млрд. долларға жеткізуге мүдделі - Елбасы
Бұл туралы бүгін Ақордада елімізге тұңғыш ресми сапармен келген Қырғызстан Республикасының Президенті Алмазбек Атамбаевпен кеңейтілген құрамдағы келіссөздердің қорытындысы бойынша бірлескен мәлімдеме жасаған Елбасы Нұрсұлтан Назарбаев айтты.
Екі ел арасындағы қарым-қатынас бұдан да жақсара түсуі керектігіне кеңінен тоқталған Елбасы: «Дегенмен де, бүгінгі таңда өткен жылдың қорытындысы бойынша сауда айналымы 750 млн. долларды құрап, 2010 жылға қарағанда 27 пайызға өсім көрсетті. Қырғыз экономикасына салынған қазақстандық инвестиция шамамен 1 млрд. американдық долларды құрады. Бұл қарым-қатынастар экономика тұрғысында ғана маңызды емес, сонымен қатар біздің елдердің қауіпсіздігін айқындауда да маңызды», - деді.
Сонымен қатар Елбасының атап өтуінше, екі елдің Мемлекет басшылары энергетика, ауыл шаруашылығы, көлік және коммуникация, тау-кен өндірісі салаларындағы ынтымақтастықты дамыту мәселелерін талқылады.
«Таяу жылдарда екі елдің арасындағы сауда айналымын миллардтық шекке жеткізуге шынайы перспектива мен мүмкіндік бар және де біз осындай тапсырма жүктейміз», - деді Н.Назарбаев.