Қазақстан азаматтығын алған жандар арманы мен басынан өткен оқиғасын айтып берді
ШЫМКЕНТ. KAZINFORM - Донияр, Абдул Керім және Светлананың Қазақстан азаматтығын алу жолындағы кедергілерді жеңуі жаңа өмірге ұмтылыстың жарқын бейнесін көрсетеді. Махаббаттың, табандылықтың және шығармашылықтың арқасында олар Қазақстанда өз орындарын тапты. Қазақ елін өз үйім деп білген шетелдіктердің шабыттандыратын оқиғаларын сіздермен бөлісіп отырмыз.
Азаматтыққа апарар жол: Донияр мен Гүлнар тағдыры
Донияр Мирзахметов 1967 жылы Шымкентте дүниеге келген. Бала кезінен музыканың құдіретін түйсініп өсті. Сегізінші сыныптан кейін Гүлістан мемлекеттік мектебіне оқуға түсіп, кейін Ташкент мемлекеттік консерваториясын үздік бітірді.
1996 жылы Өзбекстан төлқұжатын алып, шымкенттік Гүлнәрмен бірге отау құрды. Дегенмен әйелі Өзбекстан азаматтығын ала алмай, кеңестік үлгідегі құжатпен күнелтті. Ол кезде ерлі-зайыптылардың екі баласы болатын. Бюрократиялық кедергілерден шаршаған отбасы Қазақстанға қоныс аударуды ұйғарды.
Отанын оралған Гүлнәр Қазақстан азаматтығын алды. Шымкентте келген жас отбасы көп ұзамай тағы екі балалы болдыі. Олар да автоматты түрде Қазақстан азаматы атанды.
«Әйелім Өзбекстанда тұрғанда ұзақ уақыт бойы бір шешімге келе алмайтынбыз. Себебі, ол жақта азаматтық алу өте қиын еді. 20 жыл бойы күттік, содан үмітті үзіп Қазақстанға оралуды ұйғардық. Себебі, оның Қазақстан азаматы болуға толық себебі бар – ол осында дүниеге келген. Біз мұнда үлкен жетістікке жеттік! Қазір үйіміз, отбасымыз, достарымыз бар», - дейді отағасы.
Қазір Донияр Шымкенттегі музыка мектебінің халық аспаптары бөлімінде мұғалімі болып еңбек етеді. Мектеп оқушыларына гиджак ойнауды үйретіп жүр. Ол Өзбекстанда туған екі баласымен бірге Қазақстан азаматтығын алуды армандайды. Олар қазақ тілі мен ел тарихын білетіндеріне сенімді. Бүгінде алдағы емтихандарға тыңғылықты дайындалып жатыр.
«Қазақстан маған өте жақын. Мұнда менің ата-анам, балаларым, немерелерім тұрады. Халқы мейірімді және жанашыр, мен осында тұрғаныма қуаныштымын», – дейді Донияр Мирзахметов.
Ташкентте тұрғанына 30 жыл өтсе де, достары мен туыстарына қазір тек қонақ ретінде барады. Ал, өзінің үйі Шымкентте екенін және қазақстандық төлқұжатты алуды - отбасы тарихының маңызды кезеңі әрі жаңа тарауы болады деп біледі.
Нигериядан Қазақстанға көшу: Абдул Керим Адешин Абдул Фатхидің оқиғасы
KerimGold деген атпен танымал Абдул Керим Адешин Абдул Фатхи достарының шақыруымен 2014 жылы Қазақстанға көшіп келді. Сондай-ақ, қазақ тіліндегі әндерді жан-жақты орындауының арқасында әлеуметтік желілерде бірден танымал болды.
Негізі Нигериядан келген КерімГолд Қазақстанға көшкенге дейін Біріккен Араб Әмірліктерінде, Грузияда және Әзербайжанда тұрып, тіл білімі мен музыкалық қабілеттерін дамытқан. Алайда, оның айтуынша, ол еш жерде өзін Қазақстандағыдай жайлы сезінбеген.
Абдул Керим сегіз тілде сөйлей алады. Қазақ, йоруба, игбо, ағылшын, түрік, әзірбайжан, орыс және араб тілдерін еркін меңгерген. Сондай-ақ, ол кітап оқуды, әсіресе қазақ әдебиетін ұнатады, Абай Құнанбаевтың философиясын өз музыкасына шебер үйлестіргенін мақтан етеді.
Қазақстандағы он жыл ішінде KerimGold Астанада, Шымкентте және Ақтауда тұрды. Қазір Алматыға отұрақтап, шығармашылығын жалғастыруда. Осы жылы ол өзінің «Бізде бар» атты дебюттік альбомын шығарды. Бұл Қазақстанда тұратын шетелдіктің алғашқы альбомы болды. Ол негізінен қазақ тілінде 13 тректі қамтиды.
«Әр әнім даналыққа толы. Қазақстанда түрлі этнос өкілдері бейбітшілік пен келісімде өмір сүріп жатыр. Менің ойымша, бұл - өмірге жайлылық, осында қалуға деген ұмтылыс және шығармашылық мүмкіндік тудыратын мейірімді орта», - дейді музыкант.
Абдул Керимнің Қазақстан азаматтығын алудан үмітті. Елімізде екі ұлы дүниеге келгеннен кейін, Қазақстанда өмір бойы қалуды мақсат етіп отыр. Бүгінде музыкант әрі композитор 10 жыл ішінде жаңа өмірге оңай бейімделгенін айтады. Туған жерді сағынғанда, жақындарымен бейнеқоңырау арқылы хабарласып тұрады.
«Жақында менің үлкен әпкем Қазақстанның ерекше тартымдылығын түсіну үшін Лондоннан Алматыға ұшып келді» - дейді ол.
Нигерияның тумасы жақын арада өзін «Қазақстан Республикасының азаматымын» деп мақтанышпен айтатынына үмітті.
Светлана Ким: махаббат пен азаматтықтың жеке тарихы
Светлана Кимнің хикаясы – табысты интеграция мен жаңа отанға деген сүйіспеншіліктің үлгісі. Өзбекстанның тумасы, ұлты кәріс. Журналистика мамандығы бойынша диплом алып, 2004 жылы Шымкентке қоныс аударған. Светлана тез арада мамандығы бойынша жұмысқа орналасып, көп ұзамай Қазақстан азаматы Александрмен танысқан. Бірнеше айдан кейін ғашықтар үйленді. Ол кезде Светлананың Қазақстанда тек тұруға ғана рұқсаты болған.
Жасы 25-ке толғанда, бұрынғы төлқұжатының мерзімі өтіп кеткендіктен, азаматтықты өзгерту туралы сұрақ туындайды. Көші-қон қызметі оған Қазақстан азаматтығын алуды ұсынған. Светлана өз таңдауына сенімді болды. Содан бірден келісім беріп, Қазақстан азаматы атанды. Себебі, ол отбасын құрған елде қалғысы келді және сол кезде бірінші баласын дүниеге әкелді.
«Біз Қазақстанда сүйіспеншілікке толы отбасын құрдық. Қазір күйеуім екеуміздің төрт баламыз бар. Соңғы 19 жылымды жақын адамдарымның ортасында өткізгеніме қуаныштымын. Шымкенттің климаты мен туған жердегідей - жылы әрі жайлы», – дейді Шымкент қаласының тұрғыны.
Бүгінде ол табысты тележүргізуші және туристік агенттік иесі. Оңтүстік Кореяда ұзақ жылдар тұрып жатқан ағасымен бейнеқоңырау арқылы хабарласып тұрады. Светлана Ташкенттегі ата-анасына жиі барады. Олар да Шымкентке немерелерін көруге қуана келеді.
Светлана балаларымен бірге қазақ тілі мен Қазақстан тарихын зерттеуді жалғастырып жатыр. Ол көшіп-қонып, азаматтық алғанына ешқашан өкінген емес және бұл кезең ол үшін оңай болғанына әрі таңданып, әрі қуанады.
Айта кетейік, ҚР Ғылым және жоғары білім министрі Саясат Нұрбек министрлік Қазақстан азаматтығын алғысы келетін шетелдіктерге арналған тестілерді даярлауға кірісетінін айтты.
