Қазақстан дүниежүзілік «Expo Shanghai-2010» көрмесінде «Астана - Еуразия жүрегі» павильонын ұсынады

АСТАНА. Мамырдың 31-і. ҚазАқпарат /Гүлнара Жандағұлова/ - Қытайдың Шанхай қаласындағы Дүниежүзілік «Expo Shanghai-2010» көрмесіндегі Қазақстан ұлттық күнінің ресми ашылу салтанаты маусымның 5-і күні болады, деп хабарлайды ҚР Экономикалық даму және сауда министрлігінің баспасөз қызметі.

Қазақстан алғаш рет өзінің халықарылық көрме тарихында жалпы ауданы 1,5 мың шаршы метр болатын, ең үздік мультимедиалық технологиялар, Қазақстан туралы барлық ақпарат ұсынылған «Астана - Еуразия жүрегі» атты ауқымды павильон жасады. Алты ай бойы күніне 5 000 адам өте алатын павильонның жұмысын 100-ге тарта мамандар жүргізетін болады, деп хабарлайды баспасөз қызметі.

Қазақстанның «Expo Shanghai-2010» дүниежүзілік көрмесіне қатысуының негізі мақсаты - Қазақстан мен оның жас астанасының танымалдылығын арттыру, экономикалық және инвестициялық жағдайын көрсету және әлемдік қоғамдастықты Қазақстан халқының дәстүрі, тарихы, мәдениетімен таныстыру.

«Expo Shanghai-2010» дүниежүзілік көрмесіне көптеген әлем мемлекеттерін, халықаралық ұйымдар мен компанияларды көрсететін 246 павильон тіркелген.

Қазақстанның ұлттық күні бағдарламасында ұлттық туды көтеріп, Құрмет кітабына беделді қонақтардың қолжазбасын алу жоспарланған.

Қазақстандық павильонда сондай-ақ қазақстандық өнер қайраткерлерінің қатысумен гала-концерт өтеді.

«Expo Shanghai-2010» дүниежүзілік көрмесіндегі Қазақстанның ұлттық күніне ҚР-ның үкіметтік делегациясы қатысады.